} });
 

Kamanda wa Polisi Mkoa wa Shinyanga, ACP Debora Magiligimba, akizungumza na waandishi wa habari leo.

POLISI mkoa wa Shinyanga inafanya uchunguzi kuhusiana na tukio la jaribio la kuchoma moto nyumba ya mbunge mteule wa Jimbo la Shinyanga Mjini, Patrobas Katambi (CCM), iliyopo Mtaa wa Ushirika Mjini Shinyanga huku likiwatafuta na kuwakamata aliyekuwa mgombea ubunge jimbo hilo kupitia CHADEMA, Salome Makamba na mdogo wake Timoth Makamba, wakituhumiwa kuhusika na tukio hilo.

 

Akitoa taarifa kwa vyombo vya habari leo Oktoba 30, 2020,  Kamanda wa Polisi Mkoa wa Shinyanga, ACP Debora Magiligimba, amesema tukio hilo limetokea usiku wa kuamkia leo majira ya saa sita na dakika 45.

 

“Majira ya saa saba kasorobo, mbunge mteule Patrobas Katambi akiwa amelala nyumbani na ndugu zake walisikia kishindo juu ya paa la choo cha nje ambacho kipo katika eneo la uzio wa nyumba hiyo ndipo walipotoka nje na kuona moto ukiwaka juu ya paa la choo pamoja na dumu lenye mafuta aina ya petroli,” ameeleza Magiligimba na kuongeza:

 

“Wakati wakiendelea kuzima moto huo waliona gari aina ya Toyota Klugger lenye rangi ya silver likikimbiliwa na watu wawili na kisha watu wale waliingia ndani ya gari lile na kutoweka.”

Aliongeza kwamba baada ya kufanikiwa kuzima moto huo waliona gari lilelile likipita barabara ya lami ya Shinyanga – Mwanza ndipo walipoamua kulifuatilia na dereva wa gari hilo baada ya kugundua anafuatiliwa aliamua kuingia Hospitali ya Rufaa ya Mkoa wa Shinyanga na kuliacha gari hilo kisha kukimbia.

 

“Wakati wa kuwaweka chini ya ulinzi watu hao ilitokea purukushani ndani ya uzio wa hospitali na gari ya polisi iliyokuwa doria ilifika mapema na kufanikiwa kuwakamata watu wawili ambao ni Wilson Mhando Suluti (30) mkazi wa Bugweto na Jackson Raphael Peter (27) mkazi wa Bugweto wakiwa ndani gari hilo lenye namba za usajili T.729 DFP aina ya Toyota Klugger rangi ya Silver mali ya Salome Makamba aliyekuwa mgombea ubunge Jimbo la Shinyanga Mjini kupitia CHADEMA.

 

“Ilibainika kuwa watu hao tuliowakamata  ndiyo waliokuwa kwenye eneo la tukio kulingana na mavazi waliyovaa. Baada ya mahojiano, watu hao walikiri kuwa gari hilo ni la Salome Makamba na dereva aliyetoroka ni Timoth Makamba ambaye ni mdogo wake Salome Makamba,” alisema Magiligimba.

 

Amesema polisi walifika nyumbani kwa Salome Makamba na kufanya upekuzi kisha kuwakamata watu wengine wawili ambao ni Justine Owesiga (35) Mkazi wa Ndala Shinyanga na Gibson Mkongwa (31) mkazi wa Iringa waliokutwa kwenye nyumba hiyo.

 

“Juhudi za kuwatafuta na kuwakamata Salome Makamba na Timoth Makamba ambaye ndiye dereva wa gari hilo lililotelekezwa  zinaendelea. Gari husika linashikiliwa na watuhumiwa hao wanne na watafikishwa mahakamani upelelezi utakapokamilika,” amesema.

 

Amesema Salome Makamba aliachiwa jana kwa dhamana baada ya kushikiliwa na jeshi la polisi Oktoba 28, 2020,  kwa tuhuma za kumshambulia msimamizi wa uchaguzi kituo cha kupigia kura cha Bugweto B, Farida John,  na kumuumiza ambapo aliomba aone matokeo na baada ya kutoridhika nayo aliyachana na kuanza kumshambulia msimamizi huyo wa uchaguzi akiwa na wafuasi wake.


“Natoa wito kwa wanasiasa na wafuasi wao kuacha mihemko ya kisiasa inayopelekea uvunjifu wa amani badala yake wafuate sheria, kanuni na taratibu za uchaguzi na jeshi la polisi halitasita kamwe kuchukua hatua kali za kisheria kwa mtu au watu au kikundi chochote chenye nia ya kuvuruga amani nchini,” amesema Magiligimba.

soma habari kila siku kazi yetu ni kuhakikisha unapata unachotaka +255 769 305 957 #NURU YA KRISTO INAKUANGAZIA

Facebook Blogger Plugin by TeachMaker

Post a Comment

 
Top