SALUNI YAAMRIWA KUMLIPA MWANAMITINDO SH627 MILIONI KWA KUMNYOA VIBAYA

New Delhi, India (AFP). Saluni nchini India imeamriwa kumlipa mwanamitindo zaidi ya dola 271,000 za Kimarekani (sawa na takriban Sh627.4 milioni za Kitanzania) kutokana na kumnyoa nywele kinyume cha utashi wake, kitu ambacho amedai kilimsababishia "matatizo ya kiakili".

 

Aashna Roy alienda saluni hiyo iliyo juu ya hoteli moja jijini New Delhi mwaka 2018 na akataka kinyozi apunguze nywele kwa urefu wa sentimita 10, kwa mujibu wa hukumu iliyotolewa na mahakama ya wateja ya jiji.

 

"Hata hivyo, kwa mshangao mkubwa wa mlalamikaji, kinyozi huyo alinyoa nywele zake zote akiacha zikiwa na urefu wa sentimeta nne tu na hivyo kugusa mabega yake kwa shida," inasema hukumu hiyo.

 

Mahakama hiyo imeamua kuwa kutokana na ukweli kuwa Roy alishajijenga kama mwanamitindo na kuchukuliwa kwa ajili ya matangazo ya bidhaa za nywele, ukataji huo wa nywele ulimsababishia "matatizo makubwa ya kiakili na mfadhaiko".

 

"Hakuna shaka kuwa wanawake wako makini sana na waangalifu kwa nywele zao," inasema hukumu hiyo iliyotolewa na Kamisheni ya Kurekebisha Mizozo ya Walaji.

 

"Wanatumia fedha nyingi kuziweka nywele katika hali nzuri. Nywele pia zinagusa hisia zao," iliongeza.

 

"Kwa hiyo alikosa kazi alizozitarajia na kuingia hasara kubwa ambayo ilibadilisha kabisa hali yake ya maisha na kuzima ndoto yake ya kuwa mwanamitindo wa viwango vya juu."

 

Mahakama imeiambia saluni hiyo, ambayo inaweza kukata rufaa kupinga hukumu hiyo, ilipe rupia 20 milioni za India ndani ya wiki nane tangu kutoka kwa hukumu hiyo.

soma habari kila siku kazi yetu ni kuhakikisha unapata unachotaka +255 769 305 957 #NURU YA KRISTO INAKUANGAZIA

Facebook Blogger Plugin by TeachMaker