} });
 


 

Mbunge wa Tarime Vijijini Mwita Waitara ameingia kwenye mtego wa Spika wa Bunge, Dk Tulia Ackson akitajwa kuwa amefanya kosa la utovu mkubwa wa nidhamu.

 

Hata hivyo Spika Dk Tulia amesema kwa mtu yeyoyte mwenye afya ya akili asingefanya jambo kama alilolifanya mbunge huyo ingawa alitangaza kumsamehe.

 

Dk Tulia ametoa kauli hiyo bungeni leo Jumanne Juni 14, 2022 baada ya kipindi cha maswali na majibu ambapo ameleza masikitiko yake kuwa hakutegemea kama mbunge mzoefu angefanya jambo lililofanywa na Mwita.

 

Spika ametaja kosa la mbunge huyo kwamba, linatokana na kauli yake aliyonukuliwa na moja ya magazeti (sio la Kampuni ya Mwananchi Communications Limited) akipinga kitendo cha yeye (Spika) kuagiza Serikali ikachunguze madai yake kwamba wananchi wa Tarime wanauawa na kuumizwa na watu wa Hifadhi ya Serengeti.

 

Juni 4, 2022 Spika Dk Tulia aliwapa maagizo wabunge Mwita Waitara na Philip Mlugo kupeleka kwake ushahidi ndani ya siku nne baada ya wabunge hao kwa nyakati tofauti kueleza madhara makubwa wanayopata wananchi wao kutokana na wanyama.

 

Hata hivyo wawili hao waliwasilisha walichoita ni ushahidi wao kama walivyotakiwa, lakini Juni 9 Spika alitoa taarifa mbele ya Bunge kuwa walichopeleka kwake haikuwa ushahidi bali ni malalamiko lakini akaagiza Serikali kufanya uchunguzi ndani ya siku 90 na kutoa majibu.

 

Leo Spika amesema Mwita alilalamika kupitia gazeti hilo akinukuliwa kusema “Hifadhi ya Serengeti ni mali ya Serikali, lakini kuruhusu Serikali ikajichunguze yenyewe siyo sahihi hivyo spika alikosea kwani alipaswa kuunda tume huru ya kibunge ndiyo ikachunguze,”

 

Dk Tulia ameendela kunukuu kwamba mbunge huyo wa zamani wa jimbo la Ukonga alisema Spika alishawahi kuwa Naibu Mwanasheria Mkuu wa Serikali hivyo anazijua sheria na kwamba asingeweza kufanya hivyo.

 

Amesema mbunge huyo ana uzoefu na anajua kuwa alipaswa kuandika barua kwa kutumia kanuni za bunge kupeleka malalamiko yake kwa Katibu wa Bunge ili mambo yafanyiwe kazi kama hakuwa ameridhika.

 

“Kwa mtu mwenye afya ya akili alipaswa kutambua kuhusu jambo hili na hata kupongeza uamuzi wa Spika, huu ni utovu mkubwa wa nidhamu kwa mujibu wa kanuni zetu na adhabu yake wabunge mnaitambua,” amesema Dk Tulia.

 

Hata hivyo ameliambia Bunge kwamba anampa onyo mbunge huyo akimtaka asirudie tena kudharau maamuzi ya spika lakini kwa kosa hilo ametangaza kumsaheme.

soma habari kila siku kazi yetu ni kuhakikisha unapata unachotaka +255 769 305 957 #NURU YA KRISTO INAKUANGAZIA

Facebook Blogger Plugin by TeachMaker

Post a Comment

 
Top