} });
 

 

Wakati bei za mafuta zikiendelea kupaa hapa nchini, matumaini ya kushuka kwa bei ya mafuta ghafi katika soko la dunia yameanza kuonekana.

 

Taarifa ya mtandao wa Trending Economics ilionyesha hadi Julai 06, 2022 bei ya mafuta ghafi kwa pipa ilikuwa Dola 101.4 (sawa na Sh233,220) ukilinganisha Dola 115.4 (sawa na Sh265,420) mwezi uliopita.

 

Kushuka kwa bei ya bidhaa hiyo kwenye soko la dunia kunaashiria uwezekano wa kupungua kwa bei miezi miwili ijayo kwa mujibu wa Katibu wa Taasisi ya Wafanyabiashara wa Mafuta ya Rejareja Tanzania (Tapsoa), Augustino Mmasi.

 

“Mafuta tunayotumia sasa yalinunuliwa miezi miwili iliyopita kati ya Aprili na Mei, hivyo tutanunua sasa na mchakato wa kuyaleta ni baada ya miezi miwili,” alifafanua Mmasi.

 

Hata hivyo, Mkurugenzi Mtendaji wa Chama cha Wauzaji wa Mafuta Tanzania (Taomac), Raphael Mgaya alisema bei hizo zinaweza kupungua kama wastani wa bei kwa mwezi mzima utaendelea kuwa chini.

 

“Sasa hivi inawezekana imepungua lakini bei hazitabiriki, kama zitaendelea kupungua basi kuna uwezekano wa bei kupungua,” alisema.

 

Kwa bei za mwezi wa nane Mgaya alisema wastani wa bei kwa mwezi wa sita ilikuwa Dola 115 (sawa na Sh264,500) kwa pipa ukilinganisha na Dola 104 (sawa na Sh239,200) kwa mwezi wa tano.

 

“Kama Serikali itaendelea kutoa ruzuku ya kiwango hicho (Sh100 bilioni) basi kuna uwezekano wa bei kuongezeka kwa mwezi wa nane kwani bei iliongezeka mwezi wa sita,” alisema Mgaya.

 

Wakati huohuo, Ripoti ya mapitio ya uchumi kwa Mei 2022 inayotolewa na Benki Kuu (BoT), ilionyesha kupungua kidogo kwa bei. Pipa liliuzwa Dola 104.2 (sawa na Sh239,660) kwa Aprili ukilinganisha na Dola 114.4 (sawa na Sh263,120) kwa Machi.

 

Takwimu zinaonyesha bei ya mafuta ilikuwa Dola 85.53 (sawa Sh196,719) kwa Januari, Dola 95.76 (Sh220,248) kwa Aprili.

 

Sababu ya kupungua bei kwa Aprili ikinukuliwa kuwa, “Upungufu ukifuatia tangazo la Marekani na wanachama wengine wa Shirika la Nishati la Kimataifa (IEA) la kuziomba nchi kutoa mafuta waliyohifadhi ili yaweze kutumika katika kipidi hiki ambacho Russia ikiwa kwenye vikwazo”.

 

Jitihada za Serikali

Waziri wa Nishati, January Makamba alisema licha ya Serikali kutoa ruzuku, inatarajia kuanza ujenzi wa hifadhi ya kimkakati ya mafuta ya Taifa, kubadilisha miundombinu ya ushushaji wa mafuta bandarini na mwekezaji ameshapatikana.

 

“Moja ya sababu za mafuta kuwa juu ni gharama zinazotozwa kwa meli kukaa muda mrefu bandarini kwa sababu ya miundombinu hafifu. Bandari yetu kwa sasa imezidiwa na meli zinakaa muda mrefu, tumepata mwekezaji hivyo tutafumua miundombinu na kuweka mipya na kuongeza hifadhi,” alisema.

 

Bei za mafuta za Julai

 

Kwa mujibu wa Mamlaka ya Udhibiti wa Huduma za Nishati na Maji (Ewura), bei ya petroli imeongezeka kwa wastani wa Sh226 katika mikoa yote. Takwimu zinaonyesha bei ya petroli Dar es Salaam imefikia Sh3,220 mwezi huu ukilinganisha na Sh2,994 ya Juni.

 

Bei hiyo ni ya chini zaidi kwa bidhaa hiyo nchini ikilinganishwa na maeneo mengine.

 

Bei ya lita moja ya petroli imeongezeka hadi Sh3,214 mkoani Tanga na Sh3,205 mkoani Mtwara.

 

Kwa upande wa dizeli, Dar es Salaam bei imeongezeka kwa Sh12 hadi Sh3,143 na mkoani Mtwara imeongezeka kwa Sh7 na sasa inauzwa Sh3,172, mkoani Tanga bei ya bidhaa hiyo imepungua kwa Sh8 kwa kila lita na inauzwa Sh3,150.

 

Licha ya ongezeko hilo, bei ya dizeli Mkoa wa Dar es Salaam ndiyo ya chini zaidi nchini ukilinganisha na bei ya maeneo mengine.

 

Bei ya mafuta ya taa imeongezeka kwa asilimia 4.3 kutoka Sh 3,299 kwa lita moja hadi Sh3,442 mwezi Juni kwa mkoa wa Dar es Salaam.

 

Kwa mujibu wa Ewura, bei za mafuta katika maeneo mengine nchini zitategemea na ungezeko la gharama za usafiri. Bei ya chini zaidi inatarajiwa kuwa Sh3,205 kwa kila lita mkoani Mtwara.

 

Bei ya juu zaidi ya petroli ni Sh3,458 wilayani Kyerwa (Ruberwa) mkoani Kagera. Pia bei ya juu zaidi ya dizeli ni Sh3,748 na mafuta ya taa ni Sh3,679 kwa kila lita katika wilaya hiyo.

 

Msemaji wa Chama cha Wamiliki wa Mabasi Tanzania (Taboa) Mustapha Mwalongo ameiomba Serikali idhibiti bei ya mafuta haraka.

 

Dereva Gasper Kunambi alisema biashara yao imekuwa ngumu kutokana na uhaba wa wateja.

 

Saidi Kipandi dereva wa daladala kati ya Makumbusho hadi Bunju alisema bei za mafuta zinazoendelea kuwaumiza kwa kuwa zimepunguza fedha wanazopata.

soma habari kila siku kazi yetu ni kuhakikisha unapata unachotaka +255 769 305 957 #NURU YA KRISTO INAKUANGAZIA

Facebook Blogger Plugin by TeachMaker

Post a Comment

 
Top